Abbas Arazlı (İsmayılov) Cəbrayıl rayonunun Araz Maşanlı kəndində anadan olub. öz kəndlərindəki yeddillik məktəbi, qonşu Soltanlı kənd məktəbində isə orta təhsilini başa vurub. Bakı şəhərindəki Semaşko adına xəstəxananın nəzdindəki 7 nömrəli tibb məktəbini bitirdikdən sonra öz rayonlarına işə göndərilib. Kənd tibb məntəqəsində tibb qardaşı vəzifəsinə təyin edilib. Bir müddət Qumlax Soltanlı kənd xəstəxanasında işlədikdən sonra ordu sıralarına səfərbər olunub. Ordudan tərxis olunub bir müddət Soltanlı kənd xəstəxanasında işlədikdən sonra sənədlərini  M.F.Axundov adına Rus Dili və Ədəbiyyatı İnstitutuna verib və qəbul olunub.
Abbas Arazlı institutu bitirdikdən sonra təyinatla öz doğma rayonlarına göndərilib. Bir il qonşu Sarıcallı 8-illik məktəbində rus dili müəllimi işlədikdən sonra kəndlərindəki orta məktəbə dəyişdirilib. Burada daha həvəslə işə başlayan Abbas müəllim beş il müddətində yiyələndiyi peşənin vurğunu olduğunu sübut edir.  Belə ki, o,  təlimin bütün forma, metod və üsullarından bacarıqla istifadə edir. Abbas müəllim məktəbdə pedaqoji fəaliyyətə başladığı ilk günlərdən özünü bacarıqlı, işgüzar, əməksevər, eyni zamanda fəal yaradıcı bir şəxs kimi göstərmiş və ona görə də az bir vaxt ərzində nəinki dərs dediyi şagirdlərin, hətta onların valideynlərinin, eləcə də pedaqoji kollektivin dərin ğörmət və ehtiramını qazana bilmişdir. Məhz elə buna görədir ki, Abbas müəllim şagirdlərinin yaxından köməyi ilə tez bir zamanda məktəbdə rus dili kabineti yaratmışdır.

Abbas müəllim dərs dediyi şagirdlərin təlim-tərbiyəsi ilə yorulmaq bilmədən məşğul olmaqla yanaşı, yetirmələrini bilik yarışlarına da hazırlayır. Sovet dövründə keçirilən rus dili olimpiadalarında onun yetirmələri həmişə önəmli yerlər tutardılar. Onun ünvanına SSRİ EA ETPİ tərəfindən 1985-ci ildə bir dəfə şagirdlər üçün, 1989-cu ildə isə ikinci dəfə müəllimlər üçün rəy-sorğu anketləri göndərilmişdir. Hər iki halda rəy-sorğu anketlərindəki suallara tam və dürüst cavab verildiyi üçün, həmin institutun əməkdaşı A.Dubrovskinin imzası ilə göndərilmiş cavab məktubunda Abbas müəllimin iş təcrübəsinin keçmiş İttifaqın bütün məktəblərində yayılacağı bildirilmişdir. Abbas müəllim kənddə işlədiyi müddətdə pedaqoji fəaliyyəti ilə yanaşı, publisistika sahəsində də öz qələmini sınayır. O, bir çox məqalələr və eləcə də şeirlər yazaraq onları əvvəlcə rayonun "Kolxozçu", sonra isə "Xudafərin" qəzetlərində dərc etdirib.

Abbas müəllim respublikanın müxtəlif qəzetlərinin səhifələrində publisistik, metodik məqalələrlə, eyni zamanda rəy və təkliflərlə çıxış etmişdir. Onun uzun illər ərzində respublikanın və eləcə də keçmiş İttifaqın rus dilində çıxan metodik jurnallarında 10-dan çox məqaləsi dərc olunmuşdur.

Erməni cəlladların doğma torpaqlarımıza təcavüzü nəticəsində Abbas müəllim də 1993-cü ilin avqust ayında öz yurd-yuvasından məcburi köçkün kimi ailəsi ilə birlikdə Qaradağ rayonunun Sahil qəsəbəsində məskunlaşmış və həmin qəsəbədəki E.Əyyubov adına 273 nömrəli orta məktəbdə ixtisası üzrə işləməyə başlamışdır. O vaxtdan indiyə kimi Abbas müəllim özünü, sözün əsl mənasında, həqiqi pedaqoq kimi göstərmiş, bütün bilik, bacarıq və tükənmək bilməyən qüvvəsini gənc nəslin təlim-tərbiyəsi işinə sərf etmişdir. O, təkcə pedaqoji sahədəki fəaliyyətini ustalıqla yerinə yetirməklə kifayətlənməyərək, gənc yaşlarından bədii yaradıcılıqla da fəal surətdə məşğul olmuşdur.

Abbas Arazlının ilk kitabı "Ayrılıq" 1993-cü ildə çapdan çıxmışdır. Bu kitabda dərc olunan "Köçkünəm", "Kəndimiz", "Dağların", "çəkəmmirəm gözlərimi", "Kövrəlirəm" kimi şeirlərində Vətən həsrəti, Vətən məhəbbəti ürəkağrısı ilə təsvir edilmişdir. Onun ikinci şeirlər kitabı "Cəbrayılım"dır. Bu kitabda toplanmış şeirlər mövzu baxımından rəngarəngdir. Burada müəllifin həyat hadisələri, təbiət gözəlliklərini vəsf edən şeirləri ilə yanaşı, təmsilləri və satirik şeirləri də toplanmışdır.

Abbas Arazlının üçüncü kitabı 1999-cu ildə "çaşıoğlu" nəşriyyatında çap edilmiş "Şəhidlik nədir?", dördüncü kitabı  isə "Məktəb dünyası" adlanır.

Müəllifin beşinci kitabı 2001-ci ildə "çaşıoğlu" nəşriyyatı tərəfindən çap edilmiş "Təki əsgər yaşasın" sənədli povestdir. Müəllifin bu kitabı Azərbaycanın Milli Qəhrəmanı kapitan Rövşən Abdulla oğlu Rzayevin həyat və fəaliyyətinə həsr olunmuşdur.

Abbas Arazlının "Ey Azərbaycan!" adlı altıncı kitabı 2003-cü ildə işıq üzü görmüşdür.

Pedaqoji fəaliyyəti dövründə əldə etdiyi nailiyyətlərə görə  o, "Təhsil əlaçısı" döş nişanına və "Veteran medalı"na  layiq görülmüşdür.

70-dən çox bədii, publisistik və metodik məqalənin müəllifi olan Abbas Arazlı, eyni zamanda, həm də jurnalistika ilə məşğul olmuşdur. Belə ki, o, "Şərqin səsi" qəzetində şöbə müdiri işləməklə, "Təhsil" qəzeti ilə də əməkdaşlıq etmişdir. Abbas Arazlı hazırda Azərbaycan Yazıçılar və eləcə də Jurnalistlər Birliyinin üzvüdür.

Nuriyyə AĞAYEVA,

Respublikanın əməkdar müəllimi,

filologiya elmləri namizədi